Academy of the Punjab in North America
Gurmukhi Poetry Selections
Gurmit Barar
ਪੜਛਾਵਿਆਂ ਦੇ ਮਗਰੇ ਮਗਰ
ਰੁਖਸਤ
ਤੇਰੀ ਰੁਖਸਤ ਨੇ
ਪਾ ਦਿੱਤੇ
ਮੇਰੇ ਅੱਖਰਾਂ’ਚ ਚਿੱਬ
ਸੋਗੀ ਕਲਮ ਵੀ
ਭੁੱਲ ਗਈ
ਮੁਹਾਰਨੀ !
ਤੇਰੀ ਛੇਕੜਲੀ
ਧੁਰ ਉਡਾਰੀ
ਖਿੰਡਾ ਗਈ
ਖੰਭ ਉਮਰ ਦੇ !
ਚੁਗਦੇ ਹਾਂ
ਅਣਥੱਕ ਯਾਦਾਂ ,
ਤੇਰੇ ਗੀਗਿਆਂ ਦੇ
ਅਕਸ’ਚੋਂ,
ਲੱਭਦੇ ਹਾਂ
ਤੇਰਾ ਮੁਹਾਂਦਰਾ।
ਹਰ ਪੈੜਚਾਲ
ਪਾਉਦੀ ਹੈ
ਤੇਰੇ ਮੁੜਨ ਦਾ
ਭੁਲੇਖਾ।
ਪਰ ਅੰਬਰ ਦੀ
ਛਾਤੀ ਤੇ
ਉੱਕਰਿਆ ਹੈ
ਇੱਕੋ ਇੱਕ ਹਰਫ
ਕਿ
ਤੇਰੀ ਪਾਈ ਵਿੱਥ
ਵਿੱਥ ਹੀ ਰਹਿਣੀ ਹੈ। |
|
|
|
|